Silksong estará dispoñible de lanzamento no Game Pass

Xbox confirmou as novas incorporacións ao catálogo de Game Pass para setembro, cunha listaxe que inclúe lanzamentos moi agardados, actualizacións e mesmo algunhas regresos destacados.
Desde hoxe xa está dispoñible I Am Your Beast (nube, PC e Xbox Series X|S) para os subscritores de Game Pass Ultimate, PC Game Pass e Game Pass Standard. Trátase dun shooter en primeira persoa de curta duración, un thriller de vinganza encuberta no que o xogador, perseguido polo complexo militar-industrial a través da natureza norteamericana, debe empregar tanto o seu arsenal como o inimigo para sobrevivir.
Nos vindeiros días chegan varios títulos importantes. O 3 de setembro estréase Nine Sols (Xbox Series X|S), un xogo de plataformas 2D con combate baseado na defensa e ambientado nun mundo fantástico de inspiración asiática.
O 4 de setembro será a data máis sinalada: Hollow Knight: Silksong (nube, consola e PC) estará dispoñible de lanzamento en Game Pass, permitindo ascender polos recunchos dun reino espectral no papel de Hornet, a princesa protectora de Hallownest. Falamos dun dos xogos máis agardados polo éxito da súa primeira entrega, e que para PC, PlayStation e Nintendo Switch estará dispoñible a un prezo de 19,99 euros. Ese mesmo día tamén se incorpora Cataclismo (PC), un título de estratexia en tempo real centrado na construción e defensa de fortalezas fronte a enxames de criaturas.
O 10 de setembro volve ao catálogo PAW Patrol World (nube, consola e PC), a aventura en 3D baseada na coñecida serie infantil de La Patrulla Canina, con misións e rescates para xogar en solitario ou en compañía.
Finalmente, o 16 de setembro chegará RoadCraft (nube e Xbox Series X|S), un simulador no que os xogadores deberán reconstruír infraestruturas tras desastres naturais manexando máis de 40 vehículos de construción realistas, con opción de xogo individual ou cooperativo.