Confirmando o adiantado por The Information a semana pasada, nVIDIA acordou adquirir Hugging Face por 12.930 millóns de dólares (11.123 millóns de euros), nunha operación coa que pretende ampliar a infraestrutura da plataforma de desenvolvemento de modelos de intelixencia artificial e facilitar o acceso a estas tecnoloxías a desenvolvedores e institucións de todo o mundo.
Hugging Face converteuse durante a última década nun dos principais puntos de encontro para a comunidade dedicada aos modelos abertos. A plataforma conta con máis de 18 millóns de desenvolvedores, investigadores e creadores, que comparten máis de 3 millóns de modelos, 500.000 conxuntos de datos e 1 millón de aplicacións. Máis de 200.000 empresas empregan os seus servizos para descubrir, avaliar, adaptar e despregar modelos de IA.
A adquisición non suporá, segundo os termos anunciados, o peche da plataforma ao resto do ecosistema. Hugging Face continuará sendo aberta e permitirá aos desenvolvedores escoller os modelos, marcos de traballo, provedores de nube e servizos de inferencia e plataformas de computación que prefiran. O uso de hardware de nVIDIA tampouco será un requisito para desenvolver ou despregar aplicacións a través da plataforma.
O compromiso coa compatibilidade con diferentes plataformas tamén se manterá. Hugging Face continuará dando soporte a modelos de código aberto e modelos con pesos abertos procedentes de distintos desenvolvedores, así como ao desenvolvemento e despregadura en múltiples nubes e aceleradores.
A operación encaixa na estratexia que nVIDIA mantén arredor dos modelos con pesos abertos. A empresa sinala que leva anos investindo neste ecosistema e que xa contribuíu con máis de 500 modelos e máis de 250 conxuntos de datos a Hugging Face, onde se presenta como o maior contribuínte de modelos e datos abertos.
A integración permitirá reforzar a infraestrutura de Hugging Face aproveitando a capacidade de enxeñaría e a presenza internacional de nVIDIA. Entre as áreas nas que se prevén melloras están a fiabilidade da plataforma, a seguridade, a avaliación de modelos e as capacidades de inferencia e despregadura.
A operación tamén sitúa nVIDIA nunha posición aínda máis destacada dentro do ecosistema de software e modelos de IA. Hugging Face mantivo ata agora unha posición relativamente neutral ao ofrecer soporte para diferentes modelos, aceleradores e provedores de infraestrutura, polo que o mantemento efectivo desa independencia será un dos aspectos máis relevantes da integración.
Jensen Huang, CEO de nVIDIA, destacou o papel da comunidade de Hugging Face e afirmou que ambas as organizacións comparten a visión de facer a IA «máis aberta, máis capaz e máis accesible» para persoas e institucións de todo o mundo.
Os termos anunciados prevén que Hugging Face conserve a súa marca e continúe desenvolvendo a plataforma para a comunidade de IA. A compañía foi fundada por Clem Delangue, Julien Chaumond e Thomas Wolf, que construíron ao longo da última década unha das principais infraestruturas para compartir e utilizar modelos e recursos de intelixencia artificial.
