O DATAfórum Xustiza 2026, o gran evento anual sobre a transformación dixital da Xustiza, celebrará a súa quinta edición na Coruña do 21 ao 23 de outubro. O congreso reunirá a 180 expertos en dixitalización e Xustiza e máis dun milleiro de asistentes, na súa maioría profesionais do sector xurídico.
O congreso, que é de acceso libre, abordará cuestións clave para o presente e o futuro da Xustiza, como a aplicación consciente da intelixencia artificial e outras tecnoloxías para axilizar este servizo público.
Ademais do ministro Félix Bolaños, o programa contará con outros relatores destacados como José Ignacio Latorre, un dos maiores expertos mundiais en IA; a alcaldesa da Coruña, Inés Rey; a directora xeral de IA do Goberno de España, Aleida Alcaide; ou o catedrático en Dereito Procesual, Jordi Nieva. Tamén participarán conselleiros de Xustiza do Principado de Asturias, Navarra, País Vasco, Galicia e Canarias.
Este DATAfórum é un evento anual itinerante organizado polo Ministerio da Presidencia, Xustiza e Relacións coas Cortes e centrado na dixitalización da Xustiza, a clave da transformación deste servizo público impulsada desde o Goberno. Nesta edición, conta coa colaboración do Concello da Coruña e a Universidade da Coruña, así como co apoio do Tribunal Superior de Xustiza de Galicia e a Fiscalía Xeral do Estado.
A IA e outros retos da Xustiza do século XXI
O foro abordará a irrupción da IA na Xustiza desde múltiples perspectivas: como contribúe xa a axilizar este servizo público, como impacta no labor dos xuíces e avogados, que riscos hai para as garantías xudiciais ou como debe controlala e regulala o Estado.
O programa tamén inclúe sesións sobre outros retos da Xustiza do século XXI, como os delitos de odio, a desinformación, a protección dos nosos datos ou o consentimento sexual na era dixital.
Na última xornada, ademais, tres artistas falarán de transformación social e dixital desde as súas disciplinas: o cinema, con Carlos Montero (guionista de series como Elite); a música, coa violoncelista Alejandra Díaz; e o humor, con Carolina Iglesias (@percebesygrelos en redes sociais).
Preto de 200 estudantes competirán no DATAthon 2026
O DATAfórum tamén acollerá o DATAthon, un concurso no que preto de 200 estudantes de 13 universidades de toda España buscarán respostas innovadoras a necesidades reais da Administración de Xustiza.
Durante tres días, os equipos (a maioría formados por estudantes de Informática e Dereito) traballarán in situ cos seus mentores para propoñer solucións a tres retos: como atender a persoas con dificultades para desenvolverse en contornas dixitais; como achegar a Xustiza a nenos, nenas e mozas dunha forma que poidan entender e como responder mellor ás diferentes formas de comprensión de persoas neurodiverxentes.
Ademais, disputarase un Promptatón, unha competición para elixir o equipo que crea o mellor prompt (instrución a unha intelixencia artificial). O obxectivo é explorar as posibilidades da IA aplicada a documentos xudiciais anonimizados.
Os equipos gañadores coñeceranse o venres 23 ás 13.40h.
Uns cantos nomes destacados
- · José Ignacio Latorre – Físico cuántico e un dos principais expertos en intelixencia artificial. Catedrático de Física Teórica na Universitat de Barcelona e profesor visitante no Center for Quantum Technologies de Singapura, investigou sobre IA, física de partículas e información cuántica. Vén de publicar Un nuevo contrato social, un manual sobre como gobernar con intelixencias non humanas.
- Aleida Alcaide – Directora xeneral de Intelixencia artificial do Goberno de España. Traballa na estratexia española de IA, o impulso da innovación e o desenvolvemento de infraestruturas, así como no papel de España no novo escenario internacional da intelixencia artificial.
- Alberto Gago Fernández – Director xeral da Axencia Española de Supervisión de Intelixencia Artificial (AESIA). Especialista en regulación e supervisión da IA. O seu traballo aborda como garantir un desenvolvemento seguro e responsable da intelixencia artificial e protexer os dereitos das persoas.
- Alba Meijide – Enxeñeira especializada en intelixencia artificial (Universidade de Manchester) e divulgadora tecnolóxica. Achega a IA á sociedade e analiza como está a transformar o traballo, as habilidades do futuro e a relación das novas xeracións coa tecnoloxía.
- Jordi Nieva – Catedrático de Dereito Procesual (Universitat de Barcelona) e experto na relación entre Xustiza e intelixencia artificial. Investiga como a IA pode transformar os procesos xudiciais, a valoración da proba e as profesións xurídicas, así como os límites e garantías que deben acompañar o seu uso.
