ITG implanta na Autoridade Portuaria da Coruña un software específico para seguir os gastos

A Autoridade Portuaria da Coruña está a apostar pola informática achegada dende a nosa terra e, máis concretamente, por ferramentas tecnolóxicas que contribúan ao aforro e á eficacia de recursos dentro do seu seo. Segundo informa o Instituto Tecnolóxico de Galicia (ITG) no seu boletín informativo do mes de xullo, a Autoridade abriu o proceso de aplicación dun software a medida e específico que permite que cada área elabore os seus orzamentos e realice un seguimento dos gastos con independencia de que dende a Dirección Xeral se determine o presuposto final de cada exercicio. A implementación do software, que vén da man do dito Instituto, lévase a cabo en dúas fases. Na primeira, que arrincou en 2008, deseñouse e desenvolveuse unha ferramenta para que cada un dos máis de vinte centros de responsabilidade que xestionan recursos na dita Autoridade puideran efectuar os seus orzamentos. O obxectivo fundamental da medida foi traballar a prol de tirarlle o máximo rendemento aos efectivos económicos dispoñibles, tanto a nivel de gasto como de investimento.
O software posto en xogo por ITG contribúe a levar á práctica esta filosofía da eficacia e a optimización de recursos, achegándolle a cada área de responsabilidade un novo tipo de traballo: o que se fai determinando en todo intre os recursos económicos de cada acción, sabendo e indicando canto custa, que alcance ten e se se pode facer dun xeito máis económico e, ao mesmo tempo, cumprindo co regulamento vixente.
Polo que respecta á segunda fase do proxecto, dicir que se está a pór agora mesmo en marcha e consiste en preparar ao máximo a ferramenta informática para que permita efectuar avaliacións permanentes do orzamento e do estado de xestión no que se atopa cada centro de responsabilidade en materia das súas actuacións dende o punto de vista económico. “Para conseguilo”, informan ITG e a Autoridade, “preparouse un contorno sinxelo no que abonda con ter nocións de Excel ou de calquera folla de cálculo, sen que sexa preciso saber de contabilidade”.