A LaconNetwork visita Vigo na súa 16ª edición

Tras o seu paso por A Coruña, Lugo, Vigo, Santiago, Pontevedra, Boiro, Corcubión, Rivadavia, Ordes, Betanzos e Guitiriz, o «momento gastronómico de cada último venres de mes para os albaneis da nube» coñecido como LaconNetwork vai repetir cidade o vindeiro 29 de abril ás 14:00 horas na Barrica de la Alameda na viguesa Praza de Compostela (establecemento que podemos localizar grazas a ikiMap).
Este encontro de profesionais e emprendedores galegos do sector TIC serve para que numerosos entusiastas da tecnoloxía, a Internet e o emprendemento poidan verse cara a cara para compartir pareceres e experiencias, á vez que gozan da diversa gastronomía da nosa terra. Os interesados poden inscribirse na páxina web do evento, á vez que poden relacionarse previamente con algúns dos asistentes a través de Facebook.
Este mes a LaconNetwork chega á súa edición número 16, agardándose un éxito de convocatoria como vén a ser habitual neste tipo de encontros nos que casan o networking e a gastrononía.