Stallman carga agora contra Apple

Primeiro foi con Microsoft, logo con todos aqueles que cren cegamente nas vantaxes da nube e posteriormente e a un mesmo tempo, con moitas cousas máis. Richard Stallman, un dos máximos defensores do coñecemento libre e dunha informática o máis aberta posible, segue a ser, escoitémolo ou non, o cocón do sector empresarial TIC privativo, é dicir, o que protexe o seu negocio con unllas e dentes. Agora é a quenda de Apple, que tamén vén de recibir o seu, aínda que é moi posible que lle importe ben pouco, xa que as críticas de Stallman non son novas. O caso é que o gurú do software libre, que leva dende os oitenta defendendo o intercambio libre de datos, vén de dicir que hoxe en día, máis que en Microsoft, o problema está na empresa da mazá, que, ao seu xuízo, é máis “malévola” aínda que a compañía de Windows.
As declaracións foron recollidas durante unha charla en La Casa Invisible de Málaga, onde Stallman falou dos riscos de deixar que empresas como as devanditas guíen á xente cando se mergulla nas novas tecnoloxías. Na súa opinión, a súa cruzada contra Microsoft non é persoal, pero sinala que é preciso recoñecer que esta multinacional prexudica á sociedade, polo que “non debe existir”.
Durante a charla, o especialista en programación aberta recordoulles aos presentes que non ten móbil, xa que o considera un obxecto para espiar e manter controlada á xente, ao tempo que aseguraba que endexamais mercará un iPod, un dos trebellos estrela de Apple, á que cualificou de restritiva en extremo, “xa que limita incluso o dereito de executar aplicacións”. E engadiu: “Apple crea esposas dixitais, fai que a xente crea que é cool por ter os seus produtos e realiza xogos de marketing para que as cousas que fai non parezan tan malas como son”.