Telefónica convoca aos empresarios galegos para dar conta de casos de éxito no uso das redes sociais

Telefónica España vai celebrar o vindeiro 7 de febreiro, en Santiago, unha xuntanza profesional para amosar as posibilidades das redes sociais e as novas tecnoloxías en xeral no camiño da rendibilidade no mercado. A cita, convocada baixo o epígrafe As TIC e os social media: claves para a competitividade, desenvolverase a partir das 12 horas no Hostal dos Reis Católicos de Santiago de Compostela.
Segundo apunta a operadora española, organizadora do evento, o obxectivo do mesmo é afondar un pouco máis nas ferramentas tecnolóxico-dixitais que as PEME galegas e de todo o conxunto do Estado teñen ao seu dispor para melloraren a súa produtividade e competitividade, “e como internet e a integración das redes sociais na estratexia das empresas estase a converter na clave para ter éxito neste obxectivo, desde unha perspectiva moi práctica”, engaden fontes de Telefónica.
No acto, inserido nun programa máis amplo de eventos que percorren toda a xeografía estatal, ademais dos representantes institucionais do Goberno galego, contarase coa presenza activa de empresas locais que amosarán, en todo detalle, a súa experiencia e os seus logros no uso das novas tecnoloxías da información, Internet e o amplo abano de redes sociais dispoñibles arestora. Esta achega colectiva de casos de éxito galegos virá dinamizado por expertos moderadores na comunicación de tipo corporativo.