A semana que vén terán lugar na Coruña unhas xornadas internacionais sobre Erlang/OTP

A Facultade de Informática da Universidade da Coruña dará acubillo entre os días 5 e 6 de outubro á primeira edición europea do ErlangCamp que, grazas ao apoio do Centro de Investigación en Tecnoloxías da Información e das Comunicacións (CITC), facilitará aos asistentes o contacto directo con expertos mundiais na linguaxe de programación Erlang (desenvolvida por Ericsson para crear sistemas de software en tempo real concorrentes, distribuídos e fiables) e no seu framework OTP.
O propósito deste congreso é achegar un coñecemento avanzado e as experiencias necesarias para construír aplicacións distribuídas, altamente escalables e tolerantes a fallos en Erlang, dende cero. Esta tecnoloxía está a ser empregada por compañía como Amazon, HP, AOL e Facebook, e quen desexe mergullarse na mesma pode participar neste evento que por primeira vez se celebra en Europa, e para o que está aberta a inscrición.
Entre os participantes no ErlangCamp Coruña 2012 figuran expertos como Martin Logan (director de Orbitz Worldwide e autor do popular libro Erlang and OTP in Action), Eric Merrit (creador da ferramenta Sinan e autor do libro Erlang and OTP in Action) e Jordan Wilberding (socio de Erlware). Este evento conta con patrocinio e apoio institucional de ERLWARE e a Universidade da Coruña.