Android Wear amosa o seu potencial en maratóns de programación

A maratón de programación con Android Wear celebrado hoxe na ETSE da USC saldouse cunha grande participación, na que os desenvolvedores competiron na elaboración de software para os emerxentes reloxos conectados con tecnoloxía de Google (produtos que estaban entre os premios que recibían os mellores proxectos creados de xeito intensivo en poucas horas). A competición comezou cunha presentación na que se explicaron os fundamentos de Android Wear, e deuse conta da dispoñibilidade dunha API para o servizo Midíadía (que axuda a coñecer os produtos cos que nos alimentamos a diario), de xeito que os asistentes podían optar por desenvolver unha aplicación que tirase proveito do devandito servizo ou, por outra banda, apostar por unha proposta libre.
Tras a elaboración das aplicacións, que puideron probarse en reloxos con Android Wear, había que expor os proxectos, para contribuír á elección das mellores propostas, que son un bo anticipo do moito que poderá crearse con esta tecnoloxía no futuro, pois cómpre recoñecer que estamos ante unha plataforma con moito potencial, do que aínda non se coñecen as killer applications, polo que hai que confiar en que os desenvolvedores sexan os que saiban descubrir os vieiros que animen aos usuarios a vestir tecnoloxía conectada á Rede.
Baixo o mesmo formato desenvolverase outra hackathon mañá mesmo na Sala de Xuntas da Facultade de Telecomunicación da Universidade de Vigo, que espera agardar un nivel de participación semellante, e que serve para amosar tanto o nivel para o desenvolvemento de software que hai en Galicia como para dar conta das posibilidades que xa teñen tecnoloxías tan inmaturas como Android Wear.