Vodafone fornecerá servizos de telecomunicacións móbiles ao colectivo notarial

Vodafone vén de anunciar un acordo co colectivo notarial español mediante o cal a operadora convértese no seu provedor de telecomunicacións. Así o ratificaron a propia empresa e máis a Axencia Notarial de Certificación (ANCERT), entidade do Consello Xeral do Notariado para a subministración de medios tecnolóxicos, durante a sinatura dun acordo que abranguerá a achega de servizos de Vodafone durante un período de dous anos. O convenio foi formalizado polo presidente de Vodafone España, Francisco Román, e polo seu homólogo do Consello Xeral do Notariado, José Manuel García Collantes.
Segundo os termos do contrato, Vodafone España xestionará os servizos de voz e datos móbiles das notarías, facéndose cargo de máis de 13.500 servizos móbiles. Así mesmo, proporcionará a súa solución empresarial Oficina Vodafone a aquelas oficinas que queiran actualizar a súa infraestrutura de telecomunicacións. Segundo informa a operadora, con este acordo os membros do devandito colectivo “gozarán dun servizo de comunicacións móbiles integral de alta calidade e personalizado, cunhas condicións económicas moi vantaxosas respecto das actuais ofertas dispoñibles por parte das diferentes operadoras para os segmentos residencial e empresarial”.