Económicas de Santiago acollerá unha xornada sobre o mercado laboral logo do afianzamento das TIC

O vindeiro 14 de abril a Facultade de Económicas e Empresariais (Universidade de Santiago) acolle unha xornada sobre os cambios acontecidos nos últimos anos (e nos que virán) nos hábitos e nas metodoloxías usadas para demandar e ofertar emprego. Cambios que en maior ou menor medida veñen dados polo afianzamento das novas tecnoloxías: aplicacións, redes sociais, plataformas, servizos específicos en liña, etc. A Xornada Mercado Laboral e Sociedade Dixital desenvolverase entre as 18 e as 20 horas e vén da man da Asociación E3 (Estudantes de Económicas e Empresariais). A feitura do evento é de charla-debate.
O obxectivo, sinalan os organizadores, é amosar “as transformacións experimentadas polo mercado de traballo, os actuais procesos de busca de emprego e de selección de persoas; así como o desenvolvemento profesional da sociedade dixital”. Da man de Xosé Alberte Cea, un orientador laboral con coñecementos nos nosos escenarios habilitados para a procura dun emprego, a enfocarase dun xeito participativo e dinámico, convidando aos asistentes a xerar un debate arredor dos eixes temáticos principais.