Windows 10 podería ser a “derradeira versión de Windows”

Durante a celebración do congreso Ignite de Microsoft esta semana sorprenderon unhas declaracións dun dos traballadores da compañía de Redmond, Jerry Nixon, durante a explicación sobre o pasado lanzamento de Windows 8.1 e de como están a desenvolver Windows 10, xa que asegurou que “agora estamos a lanzar Windows 10, e por Windows 10 é a derradeira versión de Windows, seguimos a traballar en Windows 10”.
Ao falar da “derradeira versión de Windows” poderiamos interpretar que Microsoft abandonaría o produto, pero realmente estariamos ante algo diferente: a transformación de Windows en servizo. Deste xeito non teriamos un novo Windows cada poucos anos, senón que o sistema operativo de Microsoft estaría a recibir melloras constantemente, de xeito que non está previsto o lanzamento de grandes versións no futuro, o que podería facer que deixaramos de falar de Windows 7, Windows 8 ou Windows 10, para falar unicamente de Windows, como un sistema que, ademais, tamén chegaría a múltiple dispositivos.

Tal e como se está a traballar con Windows 10 espérase que as aplicacións principais reciban actualizacións mensuais, de xeito que o software principal de Microsoft pasaría a ter un comportamento que pode lembrarnos ao do navegador web Google Chrome, que está a recibir actualizacións constantemente sen que os usuarios se preocupen do número de versión (que sería un dato que só interesaría aos desenvolvedores).
Dende Microsoft non desmenten as declaracións de Nixon, rexeitando a realizar declaracións sobre a súa estratexia de marca a longo prazo, pero confirmando a súa confianza en Windows 10 como un produto que se manterá actualizado en numerosos dispositivos, polo que poderiamos dicir que polo momento con Windows 10 teriamos o remate da actualización periódica da marca Windows, aínda que iso non significa que no futuro non poidan dar un cambio de temón no futuro.