Os touchpads con lector de pegadas dixitais serán compatibles con Windows 10

Synaptics anunciou estes días que está a colaborar con Microsoft para a integración en Windows 10 de tecnoloxías de touchpad e identificación mediante pegada dixital, de xeito que nos vindeiros meses os fabricantes poderán incluír nos seus equipos tecnoloxía desenvolvida por Synaptics e totalmente certificada por Microsoft.
Dentro destas especificacións entraría o Precission Touchpad (PTP), concepto que mesturaría un touchpad de alta precisión con SecurePad, ou sexa, que no propio panel táctil incluiríase un lector de pegadas dixitais seguro, o que resultará especialmente interesante para os fabricantes de ordenadores portátiles, que poden así integrar un sistema de identificación seguro e totalmente compatible co sistema de identificación Windows Hello (incluído en Windows 10), sen afectar ao deseño dos seus equipos.
Con Windows Hello búscase que o usuario non teña que estar a introducir constantemente contrasinais, senón que poida identificarse ante o seu equipo informático mediante a súa identificación biométrica, o que suporía a lectura da súa pegada dixital, a identificación do seu iris ou o recoñecemento da súa cara.