A FTC oponse á compra de Activision Blizzard por parte de Microsoft

Finalmente a FTC, organismo regulador da competencia nos EE.UU., decidiu opoñerse á operación de compra de Activision Blizzard por parte de Microsoft, operación valorada nuns 69 mil millóns de dólares e que segundo a axencia gobernamental podería prexudicar seriamente á competencia dadas as grandes franquías (como Call of Duty ou Warcraft) que hai en xogo, desoíndo os compromisos de Microsoft, que nos últimos días asegurou que os xogos de Call of Duty chegarían durante os vindeiros 10 anos a consolas de Sony e Nintendo, así como a tenda dixital para PC de Valve, Steam.
A postura da FTC aínda ten que pasar agora por un procedemento de alegacións antes de que que o asunto chegue aos tribunais. Até hai pouco parecía que Microsoft non atoparía oposición na súa operación de compra, xa que o catálogo de xogos exclusivos para consolas PlayStation continúa a ser moi superior en cantidade e calidade ao que ten Xbox, e o lanzamento de grandes producións deixando de lado a consola maioritaria non sería rendible economicamente. De feito, Gabe Newell, director xeral de Valve, chegou a asegurar que non precisaba que Microsoft ofrecese ningún acordo a longo prazo para garantir a presenza de Call of Duty en Steam, pois entende que a compañía procurará levar os seus xogos ás plataformas e aos dispositivos onde estean o xogadores.
Dende Activision Blizzard aseguran que os temores da FTC son infundados, e que crer que tras a fusión con Microsoft Call of Duty sería exclusivo de Xbox non ten ningún sentido. Non só cren que un movemento así prexudicaría a reputación de Microsoft, senón que tamén deixan claro que deixar de vender Call of Duty para consolas PlayStation suporía a perda de milleiros de millóns de dólares en vendas, polo que sería un completo desastre.
Pero dende a compañía de Bobby Kotick van máis aló, e aseguran que no hipotético caso de que non houbese Call of Duty para PlayStation non sería ningún trauma, xa que os xogadores atoparían xogos alternativos rapidamente, reforzando a idea de que a Microsoft non lle interesa perder aos xogadores das consolas de Sony.
O propio Kotick asegura nunha carta aberta que non ten dúbidas sobre a fusión con Microsoft, considerando que as alegacións da FTC non se corresponden coa realidade, e salientando que pensa que a postura da FTC responde a cuestións ideolóxicas e erros de concepto sobre a industria tecnolóxica.