A Xunta Arbitral de Consumo de Galicia falla contra a suba de tarifas de Movistar Fusión
luns, 16 de novembro do 2015
- Imaxe de Lydia López (FACUA) do exterior dunha tenda de Movistar
No mes de abril entidades como FACUA advertían dunha
suba de tarifas de preto de 5 euros aos clientes de Movistar Fusión que
consideraban ilegal, por terse anunciado poucos meses antes como con “prezos
finais e para sempre”, o que tería valor contractual, e iso levou a que un
veciño de Ribadeo, Luís Vieites, optase por utilizar o formulario achegado pola
asociación de consumidores para denunciar esta práctica, o que rematou
derivándose á Xunta
Arbitral de Consumo de Galicia, que vén de decidir esixir a Telefónica
Movistar que respecte os prezos anunciados e devolver o cobrado de máis nun
prazo máximo de 30 días.
Cómpre lembrar que actualmente hai unha demanda colectiva en curso
sobre esta cuestión, o que non entraría en conflito con esta resolución de
Consumo segundo a propia Xunta Arbitral, pero que pode servir de anticipo de
cal pode ser o resultado da causa que o pasado venres iniciou o
proceso para chamar a preto de 4 millóns de usuarios a sumarse de balde contra
Telefónica de España, chamamento que polo momento só atenderon pouco máis
de 5 mil usuarios.
Coa demanda colectiva os usuarios que se deron de baixa pola suba de prezos
poderán esixir compensacións, mentres que os actuais clientes de Movistar
Fusión poderán reclamar a devolución de 5 euros mensuais das súas tarifas.
