A andaina colectiva para unir Malpica e Fisterra pola beira do mar deixa fondas pegadas na Rede
xoves, 2 de maio do 2013
O Camiño dos Faros é
unha iniciativa dupla de mobilidade e reivindicación. Un percorrido
que se fai fisicamente e que vai trazando na Rede o seu reflexo
perdurábel. Máis polo miúdo, no
blog de seu, un espazo en liña que amosa en detalle todo o
relacionado con este itinerario colectivo para promover e defender a
conservación e a utilidade dos vieiros que unen pola beiramar unhas
vilas con outras na Costa da Morte dente tempos que se perden na
memoria. Asemade, o proxecto incide na Internet sen renunciar a tirar
proveito do que esta lle envía. De feito, detrás da iniciativa
atópase un grupo de persoas que, coma unha rede social, descobre en
cada sesión-andaina a suma de novos camiñantes.
O Camiño dos Faros,
máis en detalle, é unha iniciativa para unir Malpica e Fisterra
pola beira do mar. En total, son 200 quilómetros que conectan
tódalas rutas existentes e que, en palabras dos trasnos (os
responsábeis desta andaina cada vez máis multitudinaria), “dánlles
ademais un sentido”. Cada sección do blog e do
espazo en Facebook da iniciativa é unha etapa diaria que se
percorre sen outra axuda que as pernas de cada quen. Acompáñanse os
detalles descritivos de cada etapa con múltiples imaxes feitas a pé
de campo e dun xeito colectivo, seguindo o espírito de participación
da proposta. A ruta comezou en Malpica o domingo 28 de abril, con 22
trasnos/as de diferentes idades e procedencias: Coruña, de Carballo,
de Malpica, de Baio, de Corcubión, de Vigo, de Monforte, etc. O
resultado desta primeira xeira foi como dixemos unha completa
reportaxe fotográfica e unha mensaxe ben clara: camiñar é un xeito
de reivindicar. No blog O Camiño dos Faros podemos
atopar todo o preciso, a nivel informativo e tecnolóxico, sobre este
percorrido. Por exemplo: a
ruta ao completo pormenorizada en Wikiloc (podemos baixala e
seguila dende o noso smartphone),
o itinerario en Google
Maps ou as diferentes etapas descritas punto por punto e
incluíndo quilometraxes, perfiles, descricións da contorna e
múltiples imaxes e informacións sobre as vilas que atoparemos e as
praias e cabos que teremos ocasión que percorrer.