A beta aberta de Dragon Ball FighterZ contará cun día extra por determinar

Durante as dificultades técnicas da beta aberta de Dragon Ball FighterZ, dende Bandai Namco aseguraron que ampliarían a duración das probas para compensar aos usuarios, e aínda que parecía que tras o bo funcionamento do xogo durante a xornada de onte o natural sería que adiasen 24 horas o peche do proceso de probas, finalmente optaron por unha solución diferente: en breve anunciarán unha nova data para as 24 horas de beta aberta adicionais.
Bandai Namco non só admite que está a traballar para mellorar a experiencia de xogo en liña, senón que cos axustes de calendario da beta tamén estaría a procurar facer xustiza cos usuarios, xa que o día no que o xogo non estivo dispoñible en liña foi o domingo, ou sexa, un día non laborable no que moitos esperaban poder destinar bastantes horas para coñecer máis profundamente o xogo que sairá á venda o 26 de xaneiro, e trasladar as probas a un día de semana non parece o mellor xeito de compensar tal frustración.
A beta aberta de Dragon Ball FighterZ é exclusiva das versións para Xbox One e PlayStation 4 do xogo, mentres que os xogadores de PC quedan marxinados destas probas.