Adamo levou a súa fibra óptica á metade dos concellos de Lugo dende 2018

Reunión mantida entre David Llano, Isabel Rodríguez e José Tomé

A operadora Adamo vén de facer un balance da súa actividade en Lugo para dotar aos concellos de fibra óptica até o fogar e Internet ultrarrápida. Segundo fixo saber, máis da metade dos municipios da provincia recibiron cobertura de Adamo ao longo do últimos catro anos e medio. En concreto, 35 dos 67 municipios da provincia pasaron a gozar desta tecnoloxía FTTH (siglas en inglés de fibra até o foagar) da man de Adamo entre 2018 e mediados de 2022. Por citar algúns exemplos, o operador de telecomunicacións ten a súa infraestrutura funcionando en Pol, Castro de Rei, A Pastoriza, A Fonsagrada, Alfoz, Begonte, Cervo, Xove, Barreiros, Lourenzá, O Valadouro ou Foz, entre outros.
Máis de 70.000 fogares de Lugo
En total, a compañía levou o sinal de Internet (que a operadora cualifica como “o máis veloz que existe hoxe no mercado, con 1.000 Mb”) a máis de 70.000 vivendas deses 35 concellos lucenses no citado período. Para sufragar este labor, Adamo investiu 20 millóns de euros na provincia (fronte aos 5,8 millóns que recibiu en subvencións para expandir a fibra), así como fixo posíbel a contratación de 300 traballadores locais nos seguintes ámbitos: enxeñaría, despregadura,, mantemento e comercialización.
Co presidente da Deputación e a subdelegada do Goberno
Sobre estes datos trataron a semana pasada o presidente da Deputación de Lugo, José Tomei, a subdelegada do Goberno na provincia, Isabel Rodríguez, e David Llano, responsábel de Adamo en Galicia, quen lles deu detalles sobre o novo equipamento e das operacións previstas para o terceiro e o cuarto trimestre. Por exemplo, o comezo das obras para despregar Internet ultrarrápido noutros 7 concellos lucenses: Abadín, Castroverde, Chantada, Friol, Guitiriz, Monforte de Lemos, A Pontenova e Riotorto.
A finais deste ano, 80.000 vivendas conectadas
Adamo proporcionará Internet de alta velocidade a outros 10.000 fogares da provincia de Lugo para sumar un total próximo aos 80.000 domicilios conectados antes de que conclúa 2022.