Candy Crush Saga estará incluído en Windows 10

Historicamente as distribucións de Windows incluían algúns xogos simples que se converteron nos máis xogados no mundo, como o Solitario ou o Buscaminas, e aínda que nos últimos anos decidiron que a súa instalación fose opcional, a versión preliminar de Windows 10 volverá a incorporalos, pero cunha incorporación moi sorprendente: Candy Crush Saga.
Microsoft chegou a un acordo con King para distribuír o seu popular xogo, que hai poucos meses chegou a Windows Phone, en Wiindows 10, sistema operativo para o que estarán dispoñibles outros xogos de King, dando a impresión de que as aplicacións universais van ser o grande motor do catálogo de aplicacións para os móbiles de Microsoft, xa que ao facilitar que cunha mesma aplicación poida chegarse a teléfonos, tabletas e ordenadores ábrense moitas posibilidades aos estudios detrás dos xogos de máis éxito.
Aínda que Microsoft non deu detalles sobre a volta dos xogos pre-instalados en Windows, é de agradar que iso só aconteza nas versións domésticas de Windows 10, xa que en contornos empresariais existe un claro rexeitamento a aplicacións inimigas da produtividade.