Chega a España o Honor Magic V5

A primeiros de xullo presentouse na China o novo smartphone encartable Honor Magic V5, que destacaba por un grosor de só 8,8 milímetros pechado e de só 4,1 milímetros na parte máis fina cando está aberto, converténdose para moitos nun referente nesta categoría de produto, ao que contribuía o feito de que contase cunha impresionante batería de 6.100 mAh con carga rápida de 66 watts por cable.
A espera por este teléfono dende España fíxose longa, pero por fin está aquí, aínda que coas malas novas ás que estamos afeitos cando chegan este tipo de dispositivos, como é un prezo elevado e unha batería menos xenerosa (neste caso, de 5.820 mAh), aínda que bastante superior os do resto de dispositivos deste segmento. Cómpre salientar que, aínda que o prezo do modelo con 16 GB de RAM e 512 GB de capacidade sexa oficialmente de 1.999 euros, no seu lanzamento inclúense beneficios como un cargador de 66 watts, unha funda magnética, o Magic-Pen e un desconto de 300 euros, detalles que acurtarían algo a distancia cos 9.999 iuans que custa na China (que ao cambio serían 1.199 euros).
Polo demais co Honor Magic V5 seguimos tendo un completo smartphone cun procesador Qualcomm Snapdragon 8 Elite, pantalla interior de 7,95 polgadas, pantalla exterior de 6,43 polgadas, un módulo de cámaras prominente (que alberga unha cámara principal de 50 Mpíxeles, un ultra grande angular de 50 Mpíxeles e un teleobxectivo 3x de 64 Mpíxeles) e cámaras frontais con sensores de 20 Mpíxeles (tanto na pantalla exterior como na interior), certificación IP58 e un peso de 217 gramos no seu modelo de cor branca, polo que é un bo rival para o Samsung Galaxy Z Fold7, que aínda que teña un prezo oficial máis elevado, na práctica pode conseguirse a prezos bastante axustados (incluso a través de operadores de telefonía móbil).