Elon Musk presenta a súa alternativa a ChatGPT

O pasado mes de abril sóubose que Elon Musk fundara unha nova empresa dedicada á intelixencia artificial co nome X.AI Corp, asegurando logo Musk que a súa intención era crear un TruthGPT que fose capaz de «entender a natureza do Universo», e así o pasado sábado presentouse oficialmente este produto de xAI, que finalmente recibe por nome Grok, que vén unha solución semellante ao GPT de OpenAI, pero que aínda está nunha fase de proba moi temperá, xa que unicamente leva 2 meses adestrando.
Dende xAI aseguran que Grok está deseñado para responder preguntas, pero con certa retranca, sendo a súa vantaxe principal que pode obter coñecemento en tempo real a través de X/Twitter (algo que pode ser moi discutible, se o que o usuario busca son respostas fiables).
O motor de Grok actualmente sería o grande modelo de linguaxe Grok-1 (o que deixa bastante claro que está a seguir os pasos de OpenAI, incluso a nivel de nomenclaturas), que estaría a un nivel moi semellante a GPT-3.5, pero aínda moi lonxe do GPT-4.
Para poder probar Grok de xeito anticipado abrirán o prototipo actual a un pequeno grupo de usuarios estadounidenses, cunha limitación adicional: será exclusivamente para usuarios cunha subscrición Premium+ de X (ou sexa, que terán que pagar 16 euros/mes).