En marcha unha nova canle informativa en galego: prazapublica.com

Presentación do novo medio dixital galego celebrada en Santiago/ Imaxe de EGANET

A semana pasada Santiago acolleu a presentación dun novo xornal dixital galego, Praza Pública, desenvolvido por unha vella coñecida de Código Cero: a empresa con sede no Milladoiro A Navalla Suíza. Nós non estivemos alí, pero si EGANET, asociación na que se integra a dita firma e que ofrece unha completa crónica dos feitos na súa web. Praza Dixital foi presentado na Biblioteca Ánxel Casal, en Xoán XXIII, nun acto que contou coa presenza dun bo número de profesionais dos medios e, tamén, de tres dos responsábeis directos da posta en marcha do xornal dixital: Manuel Barreiro, Marcos Pérez Pena e Filipe Díez. A canle de comunicación aínda está en desenvolvemento pero xa ten corpo de abondo como para sabermos cales van ser os seus obxectivos: apostar pola información independente, crítica, participativa e comprometida coa nosa lingua e co noso punto de vista particular.
En certo sentido, Praza Pública viría a coller a testemuña de medios xa desaparecidos, como por exemplo Vieiros. O traballo da Navalla Suíza, sinalaron no acto de presentación, serviralles para “competir a nivel de calidade da información e de aproveitamento da tecnoloxía, achegándose potencial de abondo como para pór en marcha algo diferente e seducir á comunidade internauta, tanto pola forma como polo contido”. O acto de posta en longo en Santiago tamén serviu para dar renda solta e materializar unha das arelas principais da proposta: facer que o público (os lectores) fale. Segundo nos conta EGANET, nas diversas intervencións que se escoitaron “abondaron as palabras de ánimo, os parabéns e as preguntas, mais tamén houbo crítica construtiva e ata algunha suxestión, da que os relatores tomaron boa nota”.