Facebook quere potenciar as retransmisións de videoxogos na súa plataforma

xoves, 7 de xuño do 2018 Marcus Fernández

Ante a proximidade da feira E3 dende Facebook queren promover a súa plataforma de vídeos de videoxogos, para competir así con Twitch, YouTube e Mixer, e para o que en xaneiro lanzaron un programa para creadores de contidos de videoxogos, ou sexa, para que moitos dos célebres usuarios que retransmiten as súas partidas en liña aposten por Facebook como canle para comunicarse cos seus seareiros e incluso poder rendibilizar economicamente a súa actividade.
Pero finalmente non queren limitarse a grandes creadores, e agora anuncian a creación dun programa que estará aberto a creadores emerxentes coñecido como Level Up, e que está comezando a desenvolverse, polo que está a recrutar creadores aos que facilitará tanto o acceso de ferramentas para a realización das súas retransmisión en streaming até conseguir cartos a través do apoio dos seus seareiros (que poden mercar e enviar bens virtuais durante as retransmisións).
Para facilitar que o público chegue aos contidos de videoxogos están a probar un portal de acceso que xunta os vídeos de Facebook con partidas en directo e partidas gravadas, que está accesible dende o dominio fb.gg. Neste espazo os usuarios poden descubrir vídeos en función dos creadores e xogos que sigan, das páxinas que indicaron que son do seu gusto ou dos grupos aos que pertencen. Tamén servirá para acoller eventos do sector e, para potenciar este apartado de Facebook, aseguran que financiarán contidos durante os vindeiros meses.

JPEG - 137.6 KB
Facebook vai ter presenza no E3 deste ano, para potenciar o seu apartado dedicado ás restransmisións de videoxogos

PUBLICIDADE