IBM e Apple retiran a súa publicidade de X por amosarse xunto a publicacións nazis

Algúns exemplos de publicidade xunto a publicacións nazis

Os problemas de reputación de X/Twitter en vez de mellorar, van a peor, non só pola mala xestión da información relativa ao conflito en Israel/Gaza, senón tamén por manter a súa pasividade con contidos tóxicos e discursos de odio mentres declaran publicamente que si están a tomar medidas (simplemente para tranquilizar a anunciantes e gobernos).
O pasado martes puidemos ver como o Centro para Contrarrestar o Odio Dixital (CCDH) publicou un informe no que daban conta de como, tras denunciar 200 publicacións en X/Twitter con contidos de odio (incitando á violencia contra musulmáns, xudeus e palestinos, deshumanizar aos palestinos, negar o holocausto, glorificar os nazis e promover teorías da conspiración antisemitas) que sumaban máis de 24 millóns de visualizacións, atoparon con que nunha semana continuaban en liña 196 das publicacións (o 98%) e só se emprenderan medidas contra 3 contas de usuario das 101 que fixeran as publicacións (e das que 43 eran contas verificadas).
A este informe seguiulle onte unha denuncia de Media Matters for America, advertindo que as publicacións en X/Twitter con mensaxes nazis e con outros discursos de odio presentaban ao seu carón publicidade de Apple, Bravo, Oracle, Xfinity e IBM, o que provocou inicialmente a retirada da publicidade na plataforma social por parte de IBM, compañía que aseguro ter «tolerancia cero cos discursos de odio e a discriminación» e asegurando que están a investigar esta «situación completamente inaceptable».
A percepción deste incidente agravouse seriamente despois de que o propio Elon Musk amosase o seu apoio a unha teoría da conspiración antisemita (contando as publicacións con notas da comunidade que non son visibles pese aos millóns de visualizacións que están a recibir, confirmando a inutilidade desta ferramenta que empeorou seriamente tras a entrada de Musk na compañía). Esta situación é tan grave que o voceiro Andrew Bates tamén manifestou o rexeitamento da Casa Branca ao inaceptable comportamento de Musk ao espallar horrendas mentiras antisemitas.
Nesta situación sabemos agora que tamén Apple suspendeu a súa publicidade en X/Twitter, mentres que a directora xeral da compañía de Elon Musk, Linda Yaccarino, continúa a facer declaracións públicas surrealistas, asegurando que X esfórzase en combater o antisemitismo e a discriminación, o que claramente non é certo polo que pode verse en todas as denuncias desatendidas e no comportamento do propietario da compañía.

ACTUALIZACIÓN: A Unión Europea, Disney, Lionsgate e Warner Bros. Discovery tamén anuncian que cesan a súa publicidade en X.