Microsoft demostra confiar no futuro de Xbox One

Aparte de presentar a nova Xbox One S, Microsoft realizou unha grande conferencia durante a feira E3 na que deron conta de numerosas novidades ao redor do universo Xbox, que tende pontes ao PC e incluso á realidade virtual, de xeito que case poderiamos dicir que estamos ante un período de transición dirixido a unha revolución que comezará a finais do ano que vén co Project Scorpio, unha nova e ambiciosa consola de Microsoft que mantería a compatibilidade coa Xbox One, pero casaría co vídeo el ultra alta definición e a realidade virtual, converténdose na consola máis potente da historia de confirmarse as especificacións filtradas sobre a versión renovada que se espera da PlayStation 4.

Primeiro vistazo en vídeo á nova Xbox One S ofrecido por The Verge

Novos mandos

A nivel de hardware, os mandos para Xbox One cobraron certo protagonismo durante a presentación, destacando o feito de que en EE.UU., Canadá e Porto Rico poderán gozar do Xbox Design Lab, un sistema que permite personalizar as cores dos mandos da consola en máis de 8 millóns de variacións, e que custarán 79,99 dólares cada un (podendo pagarse 9,99 dólares adicionais para gravar con láser o accesorio); aínda que os máis sibaritas poderán optar por facerse cun mando Elite sen fíos personalizado coa estética de Gears of War 4, que estará dispoñible a primeiros de outubro en unidades moi limitadas, e que terá o prohibitivo prezo de 199,99 euros.

Vídeo promocinal do mando Elite de Xbox One inspirado en Gears of War 4

Novas funcionalidades en liña

A plataforma de xogo de Microsoft tamén experimentará moitas novidades, de xeito que Xbox LIVE estreará clubs (como un xeito de conectar a xogadores e crear comunidades privadas); as consolas Xbox One e os equipos con Windows 10 poderán gozar de Arena para Xbox LIVE, que será unha nova plataforma para a creación de torneos en liña, que moitos usuarios levaban tempo esperando; o xogo cruzado entre Xbox One e Windows 10 converterase nun elemento habitual (confirmándose que o terán Gears of War 4, Forza Horizon 3, Sea of Thieves e Scalebound) e incluso se leva ao extremo co Minecraft (de xeito que os xogadores de iOS, Android, Windows 10 para teléfono e dispositivos poderán goza de modos multi-xogador entre os distintos dispositivos); o asistente Cortana chegará á Xbox One; e como detalle moi de agradecer, o xogos agora terán independencia da rexión, ou sexa, que xa non estarán atados á lingua asociada á rexión actual, de xeito que os xogadores poderán elixir a lingua na que gozan dos seus xogos.

Así será o multi-xogador de Sea of Thieves

Completo catálogo de futuros lanzamentos

Microsoft presentou unha chea de xogos que chegarán a Xbox One e Windows 10 no que resta do ano (aínda que uns poucos títulos non chegarán ata 2017), como ARK: Survival Evolved (que chegará en primicia para os sistemas de Microsoft), Battlefield 1, Dead Rising 4 (xogo presentado oficialmente neste evento); Final Fantasy XV, Forza Horizon 3 (tamén presentado oficialmente hoxe), Gears of War 4, Gwent, Halo Wars 2, Inside, Minecraft (que estrea contorno en liña multi-xogador), ReCore, Sea of Thieves, State of Decay 2 (exclusivo para Xbox One e Windows 10 presentado hoxe), Scalebound (xogo de PlatinumGames que tamén será exclusivo para Xbox One e Windows 10), Tacoma, Tom Clancy’s The Division – Expansion 1: Underground, We Happy Few e Tekken 7, destacando este último por anunciarse para 2017 cunha atractiva promoción para ir abrindo boca: os usuarios Gold de Xbox LIVE poden xa descargar de balde o xogo Tekken Tag Tournament 2.

Vídeo que deixa ver o agardado Scalebound de PlatinumGames