O CES de Las Vegas non sucumbe ante o coronavirus

mércores, 3 de xuño do 2020 Marcus Fernández

Hai uns días a organización da feira IFA de Berlín anunciou as medidas para poder celebrarse tras as restricións vixentes por mor da COVID-19, converténdose no primeiro grande evento tecnolóxico presencial posconfinamento, e aínda que moitas organizacións prefiren optar pola prudencia extrema durante a primeira metade de 2021, a Consumer Technology Association prefire ser optimista e anuncia que o CES 2021, previsto para o mes de xaneiro, será un evento presencial relativamente ordinario.
Prevese que na vindeira edición do CES de Las Vegas haxa máis contidos a través de streaming en directo, adaptándose aos novos tempos, pero continuará a apostar forte polo seu formato presencial, para o que procurarán maximizar as medidas de hixiene, cunha limpeza e desinfección regular das instalacións, promovendo o distanciamento social (para o que algunhas zonas contarán con asentos máis distanciados), instarán aos asistentes a non saudarse dando a man e a levar máscara, limitarán os puntos de contacto (por exemplo, promovendo os pagamentos sen contacto), examinarán solucións de medición de temperatura nas zonas de entrada e incluso facilitarán un mellor acceso a servizos de saúde e asistencia médica.

PUBLICIDADE