O CITIC desenvolve un proxecto de mobilidade urbana sustentábel co Concello da Coruña
xoves, 26 de marzo do 2020
O
importante traballo do Centro de Investigación TIC da Universidade
da Coruña segue adiante, aínda que atendendo polo miúdo ás normas
establecidas polo estado de alarma derivado da crise sanitaria e do
COVID-19. Un
dos proxectos máis destacados no que se traballan as investigadoras
e investigadores do CITIC é o proxecto DIMAIN (Análise
funcional para o deseño dunha marquesiña interactiva), unha
iniciativa de transferencia co Concello da Coruña que ten o
obxectivo de favorecer a mobilidade urbana sustentábel.
En
concreto, o CITIC colaborará coa Administración local na análise
da estado da arte, avaliación do mercado e análise funcional para o
deseño tecnolóxico dunha marquesiña interactiva, así como o
desenvolvemento das canles de información necesarias vinculadas á
mesma.
A
nova marquesiña tamén permitirá analizar o fluxo de viaxeiros e
medir a calidade do aire.
Segundo
informa o CITIC, o alcance de DIMAIN pasará por “ofrecer
información relevante en tempo real e contextualizada ao momento
xeográfico no que se sitúa o punto de información intelixente”.
Ademais,
engaden fontes do centro, a información non será nun só sentido,
como ten lugar na actualidade, “senón que permitirá que os
usuarios dos servizos poidan comunicarse coa Administración local e
con outros usuarios”. Neste sentido, a información será dinámica,
integrada e multicanle, “adaptándose a distintos dispositivos
tanto colectivos como persoais”.