O Campus de Ferrol acolle un ciclo de conferencias sobre a Automática e a IA

O Salón de Actos Concepción Arenal do Campus Industrial de Ferrol acolle este 14 de outubro (ás 11:30 horas) a primeira das conferencias do Ciclo Auto-Sinerx-IA. A Automática e a Intelixencia Artificial como Ferramentas para os Desafíos da Industria e da Sociedade, que organiza un grupo de profesores e profesoras do Departamento de Enxeñaría Industrial vinculados á Escola Politécnica de Enxeñaría de Ferrol (EPEF) da UDC.
A catedrática da Área de Enxeñaría de Sistemas e Automática da Universidad Complutense de Madrid (UCM), Matilde Santos Peñas, impartirá a primeira conferencia do ciclo titulada Como lle pode axudar a automática intelixente á sociedade?
O xoves 24 de outubro será o segundo relatorio da man catedrática de Enxeñaría de Sistemas e Automática da Universidad Carlos III de Madrid (UC3M), Concepción Alicia Monje Micharet, quen afondará nas oportunidades e nos retos da chamada robótica branda.
A catedrática de Ciencias da Computación e Intelixencia Artificial e investigadora do CITIC da UDC, Amparo Alonso Betanzos, falará o luns 28 de outubro sobre os mitos, as realidades e os desafíos éticos da Intelixencia Artificial.
Por último, o catedrático de Informática e Automática da Universidad Nacional de Educación a Distancia (UNED), Sebastián Dormido Bencomo, pronunciará a conferencia Realimentación: entre o natural e o artificial.
O ciclo está dirixido ao alumnado do grao en Enxeñaría Electrónica Industrial e Automática e do mestrado en Informática Industrial e Robótica, ambas as dúas, titulacións da Escola Politécnica de Enxeñaría de Ferrol (EPEF). Con todo, a actividade está aberta a toda a comunidade universitaria e ao público xeral interesado. Máis información enviando un correo electrónico a esteban.jove@udc.es.