O Echo Show 15 integra funcións de Fire TV

A finais de 2021 Amazon presentou os Echo Show 15 como unha pantalla conectada Full HD de 15,6 polgadas e cámara de 5 Mpíxeles que pode instalarse coma se fose un cadro, e que aspiraba a converterse no centro do fogar dixital, á vez que facilitaba o acceso a contidos multimedia en streaming, pero deberon entender que esta última vertente era a máis atractiva para o público, e agora o dispositivo integra Fire TV e pode controlarse con mando a distancia, de xeito que incluso podería verse como unha alternativa ao televisor nalgúns espazos do fogar.
Os usuarios do Echo Show 15 poden gozar das novas funcionalidades a través dunha actualización de software de balde, e adquirir un mando a distancia aparte, de xeito que a pantalla conectada de Amazon comportaríase dun xeito semellante a conectar un Fire TV Stick a un monitor, aínda que nesta ocasión o Echo Show 15 continúa a poder controlarse de xeito táctil, polo que estamos ante un produto moi versátil que simplemente gaña funcionalidades para integrarse mellor nas rutinas diarias dos seus usuarios.
O Echo Show 15 é un produto que pode integrarse de xeito doado nunha cociña ou en calquera outra habitación do fogar, podendo empregarse para consultar a hora, a información meteorolóxica, o calendario familiar, a domótica (por exemplo, para poder interactuar con cámaras de vixilancia) e, cando o consideremos oportuno, empregarse a xeito de Smart TV, reproducindo contido en streaming, o que fai moito máis doada a xustificación da súa compra, xa que non é un produto especialmente económico (o seu prezo oficial con mando é de 279,98 euros, aínda que actualmente véndese a 267,98 euros). A versión sen mando, que normalmente custa 249,99 euros, pode atoparse en ofertas puntuais até a 199,99 euros, prezo que segue a ser superior ao dun televisor de pequenas dimensións, pero que pode xustificarse polas súas funcionalidades adicionais.