O Premio ao Mellor Proxecto de Fin de Carreira con Software Libre bate récords de participación e calidade

Temos novidades que achegar acerca do Premio ao Mellor Proxecto de Fin de Carreira con Software Libre, un recoñecemento convocado pola axencia AMTEGA e a Oficina de Software Libre do CIXUG (o consorcio de desenvolvemento de aplicacións que abrangue as tres universidades galegas). Pois ben, por unha banda cómpre sinalar que este venres 17 celébrase o acto de entrega do galardón do certame, que vai pola súa sétima edición. Pola outra, dicir que nesta nova convocatoria acadouse “un récord histórico de participación”. Para facérmonos unha idea, recibíronse 15 inscricións, completando catorce candidatos os requirimentos esixidos para participaren. Segundo nos contan dende Mancomún (AMTEGA), houbo gran variedade de temas nos traballos presentados, que salientaron todos pola súa gran calidade.
Ademais, por vez primeira recibíronse dous proxectos que amais de software, empregaron hardware aberto. Por estas e outras razóns, engaden fontes da axencia, “a tarefa do xurado non foi un traballo doado á hora de elixir os finalistas”. De feito, explican, “todos os candidatos foron merecedores do premio”. Estes son os 14 candidatos que concorreron no concurso deste ano:
· Alexandre Filgueira Lago, Deseño e execución dun robot móbil de interiores para uso docente. O proxecto consiste no deseño e construción dun robot móbil autónomo, empregando unha placa baseada no hardware libre Arduino e o desenvolvemento dunha aplicación móbil, para Android desenvolvida coa linguaxe Appinventor, a cal está baixo licenza MIT.
· Fernando Vázquez Novoa, Implantación dun ERP de código aberto na Asociación Clúster da Xeotermia Galega. O proxecto consistiu na implantación de OpenERP na Asociación Clúster da Xeotermia Galega (ACLUXEGA) adaptando dito ERP ás súas necesidades.
· Xacobe Macía da Silva, Implementación dunha solución VDI para escritorios Linux na Universidade da Coruña. Proxecto no que se realizou unha análise das posibles solucións de infraestrutura de virtualización VDI para escritorios GNU/Linux no mercado actual, seleccionando a axeitada para o entorno da UDC, realizando o deseño, implantación e despregue da mesma nun entorno corporativo real.
· Vreixo González Caneda, Aplicativo de cálculo de rutas en transporte público con software libre. Este proxecto consistiu no desenvolvemento dunha aplicación para o sistema operativo Android, que ofrece cálculo multimodal de rutas en distintos medios de transporte publico, a pé e en bicicleta co obxectivo de servir de ferramenta de busca das mellores rutas. Fai uso da infraestrutura libre OpenTripPlanner (OTP). Ademais despregouse un servidor para a rexión da Coruña-Ferrol que inclúe os datos de autobuses de ambas cidades, as respectivas redes de alugamento de bicicletas, así como os servizos de tren de interconexión.
· Luís Alfonso Fernández Serantes, Deseño e implementación de un emulador de fontes de corrente continua a partir dun convertidor DC/DC. Trátase dun traballo de fin de grao en Enxeñería Eléctrica no que se desenvolve un programa de emulación deste tipo de baterías e o seu implementado en forma de práctica mediante unha plataforma de hardware libre.
· Iago Veloso Abalo, Sistema de grabación automática da emisión en directo dunha emisora de radio comunitaria con Software Libre. Este proxecto desenvolve unha aplicación web e un programa gravador. “A aplicación web”, informa a organización do concurso, “é a cara visible do sistema onde os oíntes atopan toda a información da emisora podendo escoitar directamente os programas a través do seu navegador ou subscribirse a aqueles que sexan do seu interese”. Pola outra cara, o programa gravador encargarase de maneira automática de capturar o son e publicar os contidos da emisora na web.
· Luís Omar Álvarez Mures, Ferramenta para o traballo interactivo con grandes nubes de puntos 3D. Este traballo fin de grao consiste no deseño e desenvolvemento dunha ferramenta software multiplataforma para a visualización, xestión e manipulación interactiva de grandes volumes de nubes de puntos 3D, como poden ser as obtidas por un escáner LIDAR.
· David Albela Pérez, Aplicación de soporte para o mantemento de produtos software. Esta achega desenvolve unha aplicación para dar soporte á xestión do mantemento de produtos software, permitindo xestionar as peticións de cambio e as actividades necesarias para desenvolvelos, proporcionando unha serie de indicadores a nivel de proceso, que permitan facer un seguimento do mantemento.
· Mª Purificación Velasco Montes, Pedais: Aplicación móbil de consulta, realización e creación de rutas ciclistas. Desenvolvemento dunha ferramenta para crear, consultar e realizar rutas ciclistas desde un dispositivo móbil. Amosa valores de tempo transcorrido, velocidade media e máxima e ruta trazada sobre un mapa.
· Rafael Malvido Rodríguez, Aplicación para a xestión de prácticas en empresas. Desenvolvemento dun aplicativo para a xestión de prácticas curriculares en empresa empregando Drupal7 para o desenvolvemento.
· Santiago Saavedra López, Trustable Distributed Storage over Untrusted Peers. Este proxecto pretende desenvolver unha rede distribuía de contidos actualizables e versionables sen necesidade dun terceiro de confianza.
· Alejandro Pernas Pan, Biblioteca e aplicación web para a realización de operacións sobre documentos. Este proxecto desenvolve unha biblioteca e unha aplicación web que permiten realizar unha serie de operacións con ficheiros en formato PDF, tales coma unión e separación de documentos, protección, desprotección, ou creación de marcas de auga, operacións que a maioría dos usuarios precisan realizar nalgún momento.
· Manuel Fontenla Cadavid, Programación en R de problemas de busca de árbores óptimas. Programación dunha serie de paquetes e bibliotecas na linguaxe de programación R e en Javascript que permiten traballar con grafos e aplicar sobre eles algoritmos para a obtención de árbores óptimas como a árbore de custe mínima, a arborescencia de custe mínima, a árbore do camiño máis curto ou a árbore do corte minimal.
· Damián Aragunde Pérez, Deseño e implementación dunha ferramenta de axuda á audición mediante o uso de tecnoloxías móbiles. Desenvolvemento dunha ferramenta para dispositivos Android OK-OH! co obxectivo de converterse en método de axuda a persoas con perda auditiva. A aplicación percibe o son circundante mediante os micrófonos e ofréceo ao usuario de maneira clara e aumentada.
Entre os devanditos proxectos, hai traballos da Escola Técnica de Enxeñería Técnica Industrial da UDC, da Escola Técnica Superior de Enxeñaría de Minas de Vigo, da Escola Universitaria Politécnica da UDC e da Facultade de Matemáticas da USC.
Polo que respecta aos cinco finalistas, son os seguintes: Vreixo González, Iago Veloso, David Albela, Santiago Saavedra e Damián Aragunde. Estes cinco candidatos deberán realizar unha breve presentación ante o xurado o vindeiro venres sobre o traballo realizado no seu proxecto, facendo especial fincapé nos aspectos relacionados co software libre, dos logros acadados, das motivacións para publicalo con licenza libre, da experiencia nas comunidades, das perspectivas de futuro, etc. Logo das presentacións, o xurado deliberará para tomar a súa decisión final e nomear ao gañador do primeiro premio, dotado con 1.500 euros patrocinado polo CIXUG, e o merecedor do accésit de 750€ patrocinado por GPUL.