TEDxGalicia botou unha ollada ao futuro

Wicho dedicou a súa charla a desbotar o mito dos nativos dixitais

O pasado sábado celebrouse unha nova edición de TEDxGalicia no Museo Centro Gaiás, na Cidade da Cultura, sendo a primeira vez que o evento repite emprazamento e, como é habitual nesta serie de encontros, o aforo estaba esgotado desde meses antes, podendo os participantes desta edición escoitar relatorios en vivo, combinados cunha charla TED internacional, unha conversa, algún sketch humorístico e varias actuacións musicais, de xeito que conseguiuse completar unha xornada moi variada para facer doada de levar a sucesión de relatorios que dentro de varias semanas poderán verse a través de YouTube para fomentar a reflexión sobre os temas abordados baixo o lema De que está feito o futuro?.

O uso da tecnoloxía na educación tamén foi un dos temas abordados durante as charlas

Por primeira vez, TEDxGalicia repartiu as súas charlas en sesións de mañá e tarde, dada a cantidade de contidos que querían achegar ao público, converténdose na edición máis ambiciosa desde evento independente TED nacido en 2010, que desta volta contou cunha importante presenza de contidos tecnolóxicos, como a chamada ao escepticismo sobre os contidos publicados a través da Rede do divulgador tecnolóxico Marcus Fernández; a reflexión sobre a educación 2.0 do mestre Alberto Sacido; a reivindicación da cortesía en liña da autora do libro NETiqueta. Comunicación en Entornos Digitales, Mar Castro; a exposición da revolución que están a supor os novos xeitos de traballo visibles nos fenómenos do coworking e a cultura Maker, da man de Chus Prol, xestora de Doutroxeito Coworking; o informático Javier Pedreira Wicho quixo desbotar o mito dos nativos dixitais, destacando que a adaptación as tecnoloxías por parte dos individuos ten que ser constante, e deixando claro que ninguén nace aprendido; e o cómico Víctor Grande quixo analizar a as polémicas sobre o humor que xorden nas redes sociais e o perigo da perda do contexto que as provoca.
O encontro pechou con agradecementos aos moitos voluntarios que o fixeron posible, destacando o caso dunha das produtoras do evento, que ao estar en estado de boa esperanza era un bo exemplo da temática da xornada, xa que servía para representar o TEDxGalicia do futuro.