O altofalante Sonos One poderá funcionar cos asistentes virtuais de Amazon e Google

xoves, 5 de outubro do 2017 Marcus Fernández

O altofalante Sonos One estará dispoñible en cor branca ou negra

O fabricante de equipos de audio Sonos porá á venda o vindeiro 24 de outubro o seu novo altofalante conectado, o Sonos One, que inicialmente será compatible co asistente virtual de Amazon, Alexa, que polo momento non funciona en español, e que en 2018 recibirá soporte por parte do asistente de Google, converténdoo nun produto moi versátil para quen queira converter un altofalante de calidade nun elemento interactivo no fogar que poida controlar dende a reprodución musical en varias habitacións até outros elementos domóticos.
Os Sonos One son algo máis que un altofalante de calidade que pode colocarse en calquera recuncho do fogar, pois integra micrófono de profundidade e conectividade tanto Flash Ethernet como Wi-Fi, de xeito que pode controlarse a través dos seus botóns, por voz e cunha aplicación móbil, aproveitándose esta conectividade tamén para relacionarse con outros altofalantes Sonos do fogar (o que permite levar a música dunha instancia a outra), deixar que Alexa dea conta das últimas novas, controlar a iluminación conectada mediante voz e outras funcionalidades que irán chegando co tempo.
Tamén é posible emparella dous altofalantes Sonos One para conseguir son estéreo ou aproveitar os altofalantes para conseguir son envolvente para películas, series de televisión e videoxogos; sendo a súa función máis apreciada a compatibilidade con 38 servizos de música en streaming como Apple Music, Spotify, Amazon Music, Google Play Music ou SoundCloud, de xeito que fai moi accesibles as plataformas de música en liña.
Este produto chega ao mercado nun momento clave, xa que en decembro Apple vai comezar a vender nos EE.UU. outro semellante, o HomePod, a un prezo de 349 dólares; e Google tamén presentou un Google Home Max que venderase nos EE.UU. a un prezo de 399 dólares a partires de novembro; de xeito que Sonos, con maior reputación no ámbito da música no fogar que o resto de fabricantes, fai unha boa xogada ao colocar no seu catálogo un produto máis económico que o dos seus competidores, e incluso resulta atractivo para quen considera que un Amazon Echo (que integra Alexa) é un produto atractivo, pero prefiren un trebello con mellor calidade de reprodución para escoitar música.

Vídeo no que explican a integración de Alexa co altofalante Sonos One

PUBLICIDADE