Os Mi AirDots Pro aspiran a converterse na alternativa económica aos AirPods

Cando en novembro Xiaomi anunciou uns auriculares sen fíos chamados AirDots, non foron poucos os que aseguraron que eran unha copia chinesa dos AirPods de Apple a un prezo moito máis reducido (falamos duns 25-35 euros en contraste cuns 179 euros), aínda que a semellanza entre ambos produtos era principalmente no nome, e para confirmalo aos poucos días filtráronse imaxes duns auriculares de Xiaomi que si tiñan unha aparencia moito máis semellante aos de Apple, que respondían ao nome de Mi True Wireless, e que finalmente esta semana chegan ao mercado como Mi AirDots Pro, que cun prezo de 399 iuans (50,88 euros) deixan clara a súa ambición, manténdose igualmente nun rango de prezo que podería valerlles impresionantes vendas como aconteceu co modelo económico.
Os Mi AirDots Pro poderán mercarse a partires do día 11, e preséntanse cunha aparencia moi semellante á dos AirPods, diferenciándose claramente polo feito de que os auriculares de Xiaomi teñen capuchóns de silicona intercambiables, detalle que destaca a simple vista.
Estes novos auriculares, compatibles con iOS e Android, contan con conectividade Bluetooth 4.2, soporte de AAC, resistencia á auga IPX4 e cancelación de ruído activa. Manéxanse mediante controis táctiles e poden cargarse no seu estoxo, de xeito que tras 1 hora de carga permiten unha autonomía de 3 horas para os auriculares, que poden introducirse para a súa recarga no estoxo para completar unha autonomía total de 10 horas.
Queda agora por ver se chegarán oficialmente a España e se o seu prezo oficial será tan atractivo como o que ten en China.