Os móbiles BlackBerry clásicos deixarán de funcionar a semana que vén

Hai anos que non chegan ao mercado móbiles con sistema operativo de BlackBerry, pois a marca xa se dera por vencida e os seus últimos smartphones (fabricados por TCL) funcionan con Android, pero ante o feito de que seguen activos terminais con BlackBerry 10 e BlackBerry 7.1 (ou anterior) os operadores e a propia BlackBerry están a lembrar que o vindeiro 4 de xaneiro estes dispositivos deixarán de estar soportados.
Normalmente cando un móbil queda obsoleto simplemente deixa de recibir actualizacións por parte do seu fabricante, pero desta volta o funcionamento dos dispositivos dependen de servidores en liña, polo que o remate do ciclo de vida de BlackBerry OS supón que os móbiles con tal sistema operativo non poderán conectarse á Internet, realizar chamadas telefónicas, enviar ou recibir mensaxes de texto e nin sequera facer chamadas a servizos de emerxencias. Deste xeito, nin sequera os máis nostálxicos poderán seguir a empregar smartphones clásicos de BlackBerry, dicindo adeus a uns dispositivos que non souberon reaccionar aos cambios do mercado e padeceron as consecuencias da perda de confianza tras unha caída do servizo en 2011 (que durou tres días deixando a millóns de usuarios incomunicados).
Cómpre salientar que os móbiles da marca BlackBerry que empreguen co sistema operativo Android seguirán a funcionar con normalidade.