Os reloxos de Samsung poderán empregarse para medir a tensión

Para utilizar os reloxos de Samsung para monitorizar a tensión é precisa a calibración periódica cun tensiómetro

Cando chegou a España o smartwatch Samsung Watch Active advertimos do feito de que este innovador dispositivo estaba á espera da certificación de organismos sanitarios para poder activar oficialmente a súa funcionalidade de medición da tensión, e finalmente Samsung anuncia a aprobación da aplicación Samsung Health Monitor polo Ministerio de Seguridade Alimentaria e Farmacéutica (MFDS) de Corea do Sur como dispositivo médico (SaMD) de xeito que pode considerarse como unha aplicación autorizada para a monitorización da presión arterial.
Nos últimos anos popularizáronse os dispositivos con medición de pulso, e incluso nalgún caso con función limitada de electrocardiograma, sendo un importante avance que tamén poidan empregarse para a monitorización da presión arterial, xa que a información achegada polos reloxos axuda a tomar decisións para levar unha vida máis saudable, especialmente no caso de usuarios con hipertensión.
O smartwatch de Samsung actual en poder gozar de monitorización da presión arterial é o Galaxy Watch Active2, que realiza as medicións a través da análise de ondas de pulso, ou sexa, empregando os sensores que monitorizan a frecuencia cardíaca, de xeito que podemos ter medicións da tensión de xeito frecuente sen a incomodidade da medición cun tensiómetro tradicional, aínda que cómpre advertir que o uso do tensiómetro segue a ser preciso, para realizar a calibración do reloxo (que debería facerse como mínimo unha vez cada 4 semanas).
A aplicación Samsung Health Monitor estará dispoñible para o Galaxy Watch Active2 a finais do presente ano e chegará progresivamente aos vindeiros dispositivos da familia Galaxy Watch.