PS Plus ofrecerá en marzo unha das súas mellores seleccións de xogos

Os xogos incluídos no servizo de PlayStation Plus tras a súa suba de prezo manteñen un bo nivel, especialmente agora que se anunciou que PS Plus deixará de lado á PS3 e á PS Vita o ano que vén, e precisamente por iso podemos asegurar que a selección de xogos que se incorporan o 6 de marzo é posiblemente a mellor en toda a historia do servizo premium da PlayStation Network.
Para comezar temos Bloodborne, un xogo para PlayStation 4 que pode considerarse nacido da serie Souls de From Software, no que haberá que emprender unha viaxe infernal e brutal na que os combates destacan pola súa grande dificultade, de xeito que os usuarios teñen que aprender pouco a pouco dos seus erros.
Para continuar con bo pé tamén teremos Ratchet and Clank para PS4, versión remasterizada do clásico de Insomniac Games para PS4, que foi un grande éxito en ambas plataformas.
Como bonificación tamén se inclúe o xogo Kyurinaga’s Revenge para PS4, froito da canteira de PS Talents.
Entre os xogos para PlayStation 3 temos Legend of Kay Anniversary e Mighty No. 9, destacando este último por ser herdeiro da saga de Mega Man e por funcionar tamén en PS4, polo que resulta bastante atractiva a súa incorporación entre os xogos de marzo.
Logo, para PS Vita (compatibles con PS4) teremos Claire: Extended Cut e Bombing Busters, estando este último claramente inspirado nos xogos de Atomic Bomberman.
Complétase unha grande colección de xogos, que na súa meirande parte poderán xogarse en PlayStation 4, co que Sony parece querer ir preparando o terreo para o abandono de PS3 e PS Vita.