THQ remata a súa bancarrota cunha venda fragmentada

Ubisoft farase cos estudos de THQ en Montreal

THQ, a compañía responsable de xogos como Darksiders, Saints Row, a saga Red Faction, Company of Heroes e incluso xogo s licenciados pola WWE, Nickleodeon, Disney e Pixar entrou nunha profunda crise tras o fracaso comercial da tableta gráfica uDraw, que tras acumular 1,4 millóns de unidades sen vender provocaría unhas perdas de ingresos duns 100 millóns de dólares, crise que non foron capaces de superar tras acollerse á protección da bancarrota, o que levou a que hoxe mesmo pechasen a súa venda por partes: SEGA faise con Relic (división responsable de Company of Heroes), Koch Media merca Volution (Saint’s Row) e a saga Metro, Crytek faise co xogo Homefront, Take-Two mercará o xogo aínda non anunciado Evolvee Ubisoft farase con THQ Montreal e o xogo de South Park.
Con esta operación buscaron maximizar os ingresos pola venda da compañía para poder satisfacer aos seus acredores, agardando que boa parte dos actuais traballadores da empresa poidan continuar a traballar para os novos propietarios da súa respectiva división (aínda que o acordo de venda non inclúe cláusulas sobre o cadro de persoal, polo que dependerá de cada caso, aínda que durante o período de transición entre propietarios que comezará o vindeiro día 25 os traballadores terán garantido o seu posto).
Estamos ante un triste final para unha compañía fundada en 1989 nos EE.UU. que conseguiu grandes éxitos e que non fracasou por desenvolver malos títulos (de feito, a meirande parte dos seus xogos tiveron unha acollida moi positiva) senón por ter tomado unhas malas eleccións estratéxicas que as levaron á bancarrota.