VermisLAB activa dende Santiago un espazo de ocio alternativo e creación tecnolóxica: o CLUB_E
xoves, 4 de novembro do 2021
O
equipo do proxecto compostelán VermisLAB, responsábel tamén da
Maker Faire Galicia (con toda probabilidade unha das feiras de
tecnoloxías abertas, creativas e participativas máis importantes do
mundo) ou o Roteiro Maker, vén de lanzar unha nova iniciativa para
achegarnos un espazo de “lecer alternativo e creación
interdisciplinar arredor das tecnoloxías”, poñendo o foco nas
ferramentas que meirande potencial poñen en xogo para impulsar o
talento da rapazada. Trátase do CLUB_E,
un proxecto dirixido aos seareiros das tecnoloxías a partir de 14
anos e sen límite de idade.
O
CLUB_E é fillo do seu tempo, e así o fai saber o equipo de
VermisLAB: “O proxecto sae á luz agora porque no contexto
actual,son máis necesarios que nunca espazos de encontro que axuden
a mozos e mozas a relacionarse a través de intereses compartidos,
dun xeito san, seguro e que aporte valor”.
Tecnoloxías
como a Intelixencia Artificial, os videoxogos, a neurotecnoloxía, a
robótica ou a ciberseguridade serán algunhas das ferramentas coas
que os/as participantes poderán desenvolver proxectos que buscan
unha aprendizaxe activa, divertida e con impacto social.
De
xeito complementario, o equipo de VermisLAB lembra que ao longo deste
ano foi quen de pechar diversas colaboracións que dotarán de
contidos vangardistas ó CLUB_E, coma o acordo con Saturdays AI, nas
súas palabras “unha das comunidades en Intelixencia Artificial
máis destacadas a nivel global”, para ter un chapter permanente
en Compostela.
Aínda
que o proxecto comezará a estar activo en xaneiro de 2022, os interesados poden inscribirse como socios. O CLUB_E levarase
a cabo os sábados de 10 a 14 e de 16 a 20h no local de VermisLAB da
Rúa do Tambre, en Santiago de Compostela.