WhatsApp beta estrea soporte para reloxos conectados

Agora que é posible instalar a mesma conta de WhatsApp en varios móbiles grazas á función multidispositivo, chega á última versión de proba de WhatsApp para Android unha funcionalidade demandada dende hai moitos anos, e que podería contribuír a unha maior demanda dos reloxos conectados: a compatibilidade con Wear OS.
Temos así que, de instalar a beta 2.23.10.10 de WhatsApp en Android podemos tamén gozar da aplicación no noso reloxo con Wear OS (como, por exemplo, o Samsung Galaxy Watch5 ou o Pixel Watch), facilitando así o acceso ás nosas conversas e mensaxes (tanto de texto como de voz) con independencia do noso teléfono, e non limitándose a atender a notificacións como até agora.
Cando se incorpora a nova versión de WhatsApp ao noso reloxo será preciso introducir na aplicación principal un código de 8 díxitos que aparecerá na pantalla do smartwatch, o que vinculará a conta co reloxo de pulso, e así poderase acceder a WhatsApp dende o reloxo con independencia do móbil, o que resulta especialmente práctico para usuarios que teñen reloxos con LTE (ou conectados a través de Wi-Fi).
Polo momento esta aplicación limita as súas funcionalidades a mensaxes de texto e voz, carecendo de soporte para a reprodución de vídeo ou a realización de chamadas, elementos que poderían chegar no futuro, pois non podemos esquecer que estamos ante a primeira versión de WhatsApp compatible con reloxos.
Espérase que no futuro chegue tamén esta funcionalidade a WhatsApp Business, e queda por ver se o Apple Watch tamén poderá gozar desta demandada prestación.