É posible instalar a mesma conta de WhatsApp en varios móbiles

martes, 25 de abril do 2023 Marcus Fernández

WhatsApp anunciou hoxe a apertura a todos os usuarios da función multidispositivo, que permite empregar a mesma conta de WhatsApp en varios teléfonos mantendo o mesmo nivel de privacidade e seguridade.
A función leva varios meses en probas, e permite que poidamos ligar o noso WhatsApp até a 3 dispositivos adicionais do mesmo xeito de como se ligaría un navegador web ou un ordenador persoal. Esta vinculación de dispositivos permite que, aínda que o teléfono principal estea apagado, o resto de dispositivos poidan seguir a enviar e recibir mensaxes.
Esta funcionalidade tamén se aplica a WhatsApp Business, de xeito que varios traballadores dunha empresa poderían instalar a conta de WhatsApp profesional nos seus propios dispositivos.
Dende WhatsApp salientan que que preparan formas alternativas e máis accesibles de vencellar outros dispositivos.

PUBLICIDADE