Xbox Game Pass chegará a PC

xoves, 30 de maio do 2019 Marcus Fernández

En 2017 Microsoft revolucionaba o mercado dos videoxogos co seus servizo de subscrición de vídeoxogos Xbox Game Pass, que por 9,99 euros/mes permite gozar dun catálogo de máis dun cento de xogos para Xbox One, pero este servizo non vai quedar aí, e veñen de anunciar que na feira E3, concretamente na presentación que realizarán o 9 de xuño, detallarán o que será a chegada deste servizo ao PC.
O Xbox Game Pass para PC tamén achegará máis dun cento de xogos para Windows 10 de compañías como Bethesda, Deep Silver, Devolver Digital, Paradox Interactive o SEGA, sendo a meirande dos títulos de fondo de catálogo, agás os dos estudios de Microsoft, que procurarán chegar directamente no día do seu lanzamento a este servizo de subscrición que tamén recompensaría aos seus usuarios con descontos do 20% en xogos e do 10% en contidos descargables.
Entre as intencións de Microsoft está que os novos xogos dos seus estudios poidan gozar do xogo cruzado en consola, de xeito que os usuarios de Xbox One e Windows 10 poidan interactuar durante as súas partidas en liña, achegando a ordenadores persoais unha experiencia de uso que en consolas conseguiu madurar moito nos últimos anos.

PUBLICIDADE