Xiaomi prepara o seu primeiro smartwatch

No verán puidemos ver como vía a luz o reloxo conectado Amazfit GTS, claramente inspirado no Apple Watch, e vese que Xiaomi quere camiñar na mesma dirección, e o 5 de novembro ten previsto lanzar o Mi Watch, o primeiro smartwatch da compañía chinesa que até o momento conseguiu grande éxito coas pulseiras deportivas Mi Band, e que poderían ter aquí un novo supervendas.
O Mi Watch tería un formato cadrado, unha coroa lateral acompañada por outro botón no mesmo lado, e incorporaría Wi-Fi, GPS e NFC, á vez que tamén indican que sería compatible con eSIM, ou sexa, que serviría para facer chamadas telefónicas incluso se estamos afastados do smartphone, polo que, se o seu prezo é o suficientemente axustado, podería converterse no primeiro smartwatch con conectividade móbil en conseguir vendas masivas nos mercados nos que Xiaomi está presente.

Mi Note 10

Xiaomi tamén está a anticipar que o Mi Note 10 será un dispositivo revolucionario, que chegará ao mercado cunha penta-cámara de 108 Mpíxeles, ou sexa, que en breve teremos unha versión global do Xiaomi CC9 Pro, móbil chinés con zoom óptico de 5x (híbrido de 10x e dixital de 50x) na súa cámara telefoto, 12 Mpíxeles no seu sensor de profundidade (para retratos), 108 Mpíxeles e apertura f/1.7 na súa cámara principal, 20 Mpíxeles na súa cámara de ultra grande angular e incluso cunha quinta cámara para fotografías tipo macro (capaz de enfocar a só 1,5 centímetros de distancia).
Este novo teléfono tería un grosor de 9,67 milímetros, un peso de 208 gramos, unha batería de 5.170 mAh e pantalla OLED Full HD+ de 6,47 polgadas con lector de pegadas integrado, que promete ser un dos referentes no mercado durante os vindeiros meses.