Facebook fará máis doado o control dos contidos compartidos

Facebook anunciou unha serie de melloras na xestión da privacidade á hora de compartir publicacións, fotografías, etiquetas e outros contidos na súa plataforma, o que supón un cambio visual para que as distintas opcións que limitan quen pode ver o que compartimos estará máis visible, facilitando a xestión da nosa privacidade.
O perfil de usuario amosa información como o noso lugar de nacemento ou as nosas fotografías, e agora será doado ver con quen compartimos estes elementos sen ter que dar moitos pasos. Ata o momento, cando alguén nos etiquetaba nunha fotografía, esta aparecía automaticamente no noso perfil, pero agora deberán pasar por un proceso de aprobación pola nosa banda. O proceso de aprobación tamén se aplicará ás fotografías que compartamos en Facebook, de xeito que poderemos revisar as etiquetas que realice nas mesmas outro usuario.

Os perfís tamén amosarán a posibilidade de comprobar cómo verían o noso perfil outros usuarios (característica que segundo a xente de Facebook estaba a ser moi demandada, e que curiosamente ten Google+ dende o seu inicio).
Á hora de compartir contidos tamén será doado indicar con quen se comparten os distintos elementos, aparecendo unha etiqueta en cada un, indicando quen pode ver cada publicación, o que polo momento é unha prestación moi xenérica pero que no futuro agardan que sirva para sinalar grupos de persoas máis reducidos cos que compartir información (outra vez seguindo os pasos de Google+).

As publicacións tamén poderán xeolocalizarse, o que antes só podía facerse dende Facebook Lugares, pero que agora espállase a todo Facebook, o que suporá a paulatina desaparición de Lugares.
Estes cambios irán espallándose nos vindeiros días durante os usuarios de Facebook, buscando mellorar a súa experiencia no servizo, coidando a moi criticada política de privacidade de Facebook.