O currículo completo de bacharelato estará dispoñible no repositorio de contidos do espazoAbalar

O repositorio do espazoAbalar recollerá o currículo completo de bacharelato

A Consellería de Cultura, Educación e Ordenación Universitaria e a Axencia para a Modernización Tecnolóxica de Galicia (AMTEGA) porán a disposición da cidadanía, de forma totalmente gratuíta, o currículo completo de bacharelato no repositorio de contidos do espazoAbalar, para fomentar o uso das TIC no proceso de ensino-aprendizaxe. Os docentes van a poder incorporar as unidades didácticas á aula virtual do seu centro, adaptando a temporalidade, os contidos, as actividades, etc. para a aula ou o para seu uso fóra da mesma.
Así mesmo, facilita a participación activa do alumnado no seu propio proceso de aprendizaxe e para aqueles estudantes que, por enfermidade non poden asistir a clase, permite estar en contacto co profesorado e supervisar os contidos que se van impartindo en cada sesión, así como participar co envío das tarefas.
Por outra banda, preténdese dar un maior alcance dos recursos educativos ás persoas interesadas en cursar os seus estudos a distancia -en especial as que se atopan en situación de desemprego-, debido a que van a poder acceder ao currículo sen custe algún.
Deste xeito, favorécese un espazo educativo no que tanto os docentes como o alumnado poidan desenvolver as súas actividades académicas.
Polo momento no repositorio do espazoAbalar están publicadas practicamente a totalidade das unidades didácticas que desenvolven o currículo completo de 1º de Bacharelato. Dito material utilízase na modalidade a distancia do Bacharelato impartido no IES San Clemente e na súa realización participaron docentes de diversos centros galegos coordinados pola Consellería e o devandito instituto.
Nas vindeiras semanas vanse publicar no espazo Abalar todas as unidades didácticas das materias correspondentes aos dous cursos de Bacharelato, un total de 35 materias.