O proxecto Abalar convertirá máis de 200 colexios e institutos en Centros Educativos Dixitais
venres, 5 de marzo do 2010
A partir do
vindeiro curso escolar 2010-2011, arredor de 14.500 alumnos e alumnas de
educación primaria e secundaria obrigatoria do noso país poderán mellorar as súas
competencias dixitais e manexo de Internet grazas á implantación nos centros
educativos galegos do proxecto Abalar, unha iniciativa do Goberno galego que
persegue un cambio no actual modelo de ensino-aprendizaxe, coa conversión dos
colexios e institutos en Centros Educativos Dixitais (CED), a fin de mellorar a
súa eficiencia, eficacia e modernización.
O conselleiro
de Educación e Ordenación Universitaria, Xesús Vázquez Abad, presentou hoxe
mesmo este proxecto, acompañado, entre outros membros do executivo galego, da secretaria
xeral de Modernización e Innovación Tecnolóxica, Mar Pereira e do director
xeral de Educación, Formación Profesional e Innovación Educativa, Jose Luís
Mira Lema.
Abalar, que é segundo
informaron os seus responsables, “un dos
programas máis ambiciosos do Goberno galego nesta lexislatura”, substancia
a estratexia para a integración plena das TIC na práctica educativa en Galicia, “como unha das áreas prioritarias de
intervención da Consellería”.
A Consellería
de Educación, en colaboración coa Secretaría Xeral de Modernización e Innovación
Tecnolóxica da Xunta inviste máis de 8 millóns de euros para integrar as
Tecnoloxías da Información e da Comunicación (TIC) en todos os ámbitos do
ensino, mediante accións que permitan dotar de equipamento e infraestruturas
aos centros, así como de contidos e ferramentas dixitais axeitadas.
Asemade, no
presuposto entra a formación dos membros da comunidade escolar nas novas
tecnoloxías, algo necesario para que o proxecto saia adiante con éxito.
Tal e como
explicou o conselleiro de Educación, o proxecto Abalar integrará os recursos
actuais dun xeito “organizado, eficiente
e lóxico, aproveitando ademais os recursos que o Ministerio de Educación propón
ás Comunidades Autónomas no marco do Proyecto Escuela 2.0, que achega arredor
de 4,3 millóns de euros, co fin de acadar o seu obxectivo no menor tempo
posible”.
O proxecto, que
estenderá a súa actuación ata 2013, dotará xa neste primeiro ano de
equipamentos e dispositivos informáticos a máis de 700 aulas, distribuídas en
máis de 200 instalacións educativas de Galicia. Porén a intención é que as
novas tecnoloxías da información e a comunicación cheguen a máis de 1000
centros educativos e a 87.000 alumnos e alumnas o antes posible, a poder ser
nesta lexislatura.
Para a responsable de Innovación Tecnolóxica, Mar Pereira, o proxecto
Abalar, que tamén inclúe ás familias na metodoloxía educativa, representa un
esforzo conxunto para a integración das TIC na educación e “foi concibido como un piar fundamental para a modernización de
Galicia, permitindo reducir a histórica fenda dixital e mellorar o benestar da
cidadanía”.
Pero se cadra,
o máis destacable deste proxecto, ademais da mellora da interactividade e da
relación profesor-alumno, é a esperanza que se lle trasmite ás familias dos
alumnos que requiren dunha atención especial e diferenciada, os cales poderán
ser educados a distancia e interactuar cos seus profesores e compañeiros de
aula sen ter que moverse dos seus fogares ou centros hospitalarios.