COGAMI e Vodafone cooperarán na inserción laboral das persoas con discapacidades

A Confederación Galega de Minusválidos (COGAMI) segue a ter no punto de mira as novas tecnoloxías da información como elemento indispensable para a calidade de vida das persoas con discapacidades. Nesta liña é onde se sitúa o acordo que vén de asinar coa Fundación Vodafone España co obxectivo de facilitar o acceso destes colectivos ó mercado de traballo, neste caso a través do Programa Vodafone para a Inserción Laboral de Persoas con Discapacidade. Os fins desta iniciativa, segundo informa COGAMI, son informar, asesorar, formar e capacitar para o emprego a 100 persoas que estean hoxe en situación de desemprego nas comarcas das sete principais cidades galegas e nas bisbarras limítrofes, “así como inserir laboralmente ó 50% dos participantes”.
Segundo a Confederación (que ten na súa web un apartado específico para contactar con empresarios que poidan achegar postos de traballo), as perspectivas futuras coa axuda de Vodafone son boas, xa que a plataforma galega parte dunha situación de 465 persoas inseridas no eido laboral na área de Santiago en 2006.
Destas insercións, sinala COGAMI, 130 (o 28%) corresponden a centros especiais de emprego e 335 (72%) á empresa ordinaria. Amais, estas cifras constitúen un incremento respecto ás de 2005, no que se rexistraron 413 insercións. Estes datos foron achegados polo Servizo de Integración Laboral da Confederación (SIL).