Piden sete millóns de euros en eBay polo primeiro vinilo de Frank Sinatra

O das poxas en Rede semella unha fonte inesgotable de información sobre vendas de obxectos frikis, e en moitos casos a prezos completamente desorbitados. Ou sexa: non é que non existisen dende sempre as subhastas de trapiños de actores míticos, pero Internet multiplicounas en calidade e en cantidade, e ó incrementarse o número de interesados, os prezos dispáranse. Ou sexa, que se temos na casa o pomo dunha porta na que Marilyn Monroe pousou a man esquerda, probablemente a Rede é o mellor que nos podía pasar para redondear ingresos. Isto máis ou menos é o que lle vén de acontecer ó internauta que ten depositado nun banco de Andorra o primeiro vinilo gravado por Frank Sinatra e que vén de ser posto en eBay para a súa poxa (que remata o venres). O seu prezo, para quen estea interesado, é inicialmente de sete millóns de euros.
Partindo da base de que hoxe en día todo disco de vinilo gravado e editado dos anos 70 cara a atrás é por si mesmo unha peza de coleccionismo, que se teña presentado unha gravación de Frank Sinatra do ano 1935 semella unha xogada segura para calquera que teña certo coñecemento sobre o mercado de antigüidades e trebellos de segunda man. Ou sexa: non faltará quen pague o que se pide. O caso é que o disco en cuestión gravouse no Hotel Waldorf Astoria de Nova York para o selo Columbia, segundo informa Europa Press. Tanto este detalle como o feito de que trate da primeira vez que Frank Sinatra rexistraba a súa xa mítica voz perante un micrófono (e cantando Stars in your eyes) e ó carón da Gran Orquesta de Xabier Cugat, contribúen certamente a facer desta peza de coleccionismo unha das grandes estelas da tempada no servizo eBay, amais dunha masiva campaña publicitaria de balde para esta casa de poxas en liña.