Continúan as protestas contra os 179 despedimentos de traballadores de Atento na Coruña

Até 179 traballadores das dependencias da teleoperadora Atento na Coruña foron despedidos este 14 de marzo, algúns deles mesmo con baixa médica. A reacción do colectivo non se fixo agardar, e onte concentráronse nas rúas da cidade para amosar a súa desconformidade coa estratexia de despedimentos da empresa, e todo indica a que nas vindeiras horas continuarán as mobilizacións, tanto de xeito presencial como nas redes, tal e como podemos ver na web www.deslocalización.com. Así, hoxe mesmo (xoves 15), estaba programada unha concentración nas dependencias da empresa. Cómpre subliñar que Atento, que é filial de Telefónica e achega servizos de información e de telemarketing (entre outros), conta na dita cidade galega con 1.200 traballadores.
Esta política de despedimentos non é nova, xa que comezou a levarse á práctica hai aproximadamente un ano en Xetafe (120 traballadores atoparon as portas pechadas das oficinas onde desenvolvían o seu labor), Valencia (400 despedidos en abril do ano pasado), Barcelona, Córdoba e Sevilla. O obxectivo de Atento, que recoñece que os despedimentos son improcedentes, é (segundo apuntan os colectivos afectados) trasladar de xeito gradual os seus departamentos de atención ó cliente a países emerxentes como Perú, Marrocos, Brasil, México ou Venezuela.
A xuízo da Coordinadora Unitaria de Traballadores do Telemarking en apoio do Comité de Empresa de Atento, “esta deslocalización non respecta os dereitos dos empregados nin a protección de datos dos clientes, ademais de constituír un abuso de confianza recibida por parte das institucións en forma de subvencións para formación e tendido telefónico”. A Coordinadora está neste intre a facer continuos chamamentos de apoio ós prexudicados entre colectivos laborais, sindicatos, institucións públicas, organizacións cidadás e mesmo entre os clientes da devandita empresa.
Para o secretario nacional da Federación de Telemárketing da CIG, Clodomiro Montero, non se pode permitir que o Goberno destine cartos públicos para subvencionar unha empresa que o ano pasado tivo máis de 6.000 millóns de euros de beneficios (un billón das antigas pesetas), e mesmo achegando solo público de balde para a habilitación de novos centros de traballo; e que logo a empresa afronte unha política de despedimentos e deslocalización como a que leva afrontando dende hai máis dun ano a través de Atento.
E todo isto, engade, coa autorización previa dun organismo dese mesmo Goberno para trasladar os datos persoais e financeiros, de millóns de persoas cara ó estranxeiro. E prosegue: “Atento-Telefónica está a reestruturar os centros de traballo de Valencia, Córdoba Madrid e acaba de despedir a 179 persoas na Coruña, deslocalizando a súa actividade cara a Perú e Colombia, entre outros países; pero é máis: esta deslocalización é posible despois de que a Axencia Estatal de Protección de Datos permitira a Atento-Telefónica trasladar as bases de datos de clientes a estes países”.