Case a metade de teléfonos móbiles son chineses

Como era de imaxinar (debido á cantidade de chineses que hai no mundo e á súa afección declarada polos dispositivos innovadores), o último informe que vén de publicar Research and Markets sobre a Industria da Telefonía Móbil 2006-2007 indica que China é o país onde se fabrican máis teléfonos móbiles, acaparando concretamente o 46,9 por cento da produción mundial destes dispositivos. Ademais, arredor de 103 millóns de móbiles foron vendidos no mercado doméstico deste país e máis de 250 millóns foron exportados ó estranxeiro.
O total de envíos de teléfonos móbiles en todo o mundo ó longo de 2006 foi de aproximadamente 970 millóns de unidades, cunha produción que xerou 79.000 millóns de dólares.
O mercado está ateigado na súa meirande parte polos nove principais fabricantes de telefonía mundial, que abranguen o 90,7 por cento do total das vendas. Neste senso, Nokia é o número un en termos de volume de ventas, con máis de 347 millóns de unidades.
De xeito paradoxal (por mor do inevitable efecto da globalización) outro país (amais de China), no que está a medrar a industria do móbil de xeito considerable é a India, onde basicamente ten lugar a cadea de montaxe, pero aínda está moi lonxe de acadar as cifras do xigante veciño, xa que son poucos os fabricantes importantes dispostos a trasladarse ata alí.