Os navegadores GPS para os coches, no punto de mira da DXT

A Dirección Xeral de Tráfico está a estudar ata que punto os navegadores para os coches (sistemas GPS baseados na localización vía satélites) son proveitosos ou ben prexudiciais para a condución. Segundo informa A Voz estes días, a DXT podería estar a un paso de cualificar como “infracción” o manexo deste dispositivo co automóbil xa en marcha, ó supoñer un máis que probable motivo de distracción. De prosperar a dita iniciativa, poderíamos estar falando dun duro golpe para o sector da tecnoloxía aplicada á cuestión da seguridade viaria, que no caso dos navegadores xa está presente en 85.000 vehículos vendidos en España.
Segundo apuntou Pere Navarro, director da DXT, a oficina xa se ten dirixido en ocasións anteriores ás empresas fabricantes destes dispositivos devanditos para pedirlles que os deseñen de xeito que non se podan programar co automóbil en circulación. O caso é que xa existen investigacións previas sobre a potencial perigosidade no manexo dos navegadores. Segundo o estudo da Fundación Mapfre (que non discute a axuda que achegan nin a utilidade á hora de situarnos na estrada) sobre o emprego do GPS nos turismos, o 100% dos condutores que programan os devanditos aparellos en marcha non chega a albiscar sequera as sinais de tráfico neses “intres críticos, incluída sinalización de pasos de peóns ou zonas escolares montadas sobre paneis de alta visibilidade”.